कोपा अमेरिका : चिली क्वाटरफाइनलमा, सान्चेज र भार्गासको दुई दुई गोल
असार १ – चिली कोपा अमेरिका फुटबलको क्वाटरफाइनलमा पुगेको छ । बुधबार बिहान फिलाडेलफियामा भएको खेलमा डिफेन्डिङ च्याम्पियन
चिलीले पानामालाई ४–२ ले हराएर अन्तिम ८ मा स्थान बनाएको हो । चिलीको जितमा एलेक्स सान्चेज र एडवार्डो भार्गासले दुई दुई गोल गरे । खेलमा अग्रता भने पानामाले लिएको थियो ।
पाँचौं मिनेटमा नै मिगुएल कामार्गोले गोल गर्दै पानामालाई सुरुवाति अग्रता दिलाए । १५ औं मिनेटमा भार्गासले चिलीका लागि बराबरी गोल फर्काए ।
४३ औं मिनेटमा भार्गासले व्यक्तिगत दोस्रो गोल गरेपछि चिलीले पहिलो हाफमा २–१ को अग्रता लियो । ५० औं मिनेटमा सान्चेजले व्यक्तिगत पहिलो गोल गरेपछि चिलीको अग्रता ३–१ मा पुग्यो ।
७५ औं मिनेटमा पानामाका अबदिएल आरोयोले गोल गरेपछि खेल ३–२ को अवस्थामा पुग्यो । तर ८९ औं मिनेटमा सान्चेजले व्यक्तिगत दोस्रो गोल गर्दै ४–२ को जित दिलाए ।
समूह डी मा रहेको चिली दुई खेलमा जित र एकमा हारसहित ६ अंक जोडेर क्वाटरफाइनलमा पुगेको हो । पहिलो खेलमा अर्जेन्टिनासँग २–१ ले हारेको चिलीले दोस्रो खेलमा बोलिभियालाई २–१ ले हराएको थियो ।
0 comments
प्रतिक्रिया दिनुहोस्...