राजविराजः चोरी अभियोगमा फरार रहेका नयाँ शक्ति नेपालका अन्तरिम केन्द्रीय परिषद्का सदस्य तथा सप्तरी संयोजक अनिल भनिने अरुणकुमार साह राजविराज कारागारमा थुनामा परेका छन् ।
जिल्ला अदालतले नकटी रायपुर गाविस–४ का ३२ वर्षीय साहलाई चार वर्ष एक महिना १५ दिनको कैद सजाय फैसला गरेको आधारमा सोमबार कारागारमा थुनामा पठाइएको अदालतका श्रेस्तेदार नरेन्द्र कुमार श्रेष्ठले बताए ।
जिल्ला अदालतले फरार अभियुक्तमा राखेका साहलाई इलाका प्रहरी कार्यालय रुपनीले नकटी रायपुर गाविस–८ स्थित रुपनी चोकबाट गतराति पक्राउ गरेको थियो ।
पक्राउपछि नयाँ शक्तिका केही कार्यकर्ताहरुले आधा घण्टा चक्काजाम गरी ढुंगामुढा गरेपछि प्रहरीले लाठीचार्ज गरेको थियो ।
स्थानीय प्रशासनले साहलाई पक्राउ गरी कारागार चलान गरेकोमा नयाँ शक्ति नेपालले निन्दा तथा भत्र्सना गरेको छ ।
द्वन्द्वकालिन मुद्दा ब्युँताएर फर्जी सहीछापको आधारमा झुठो मुद्दा लगाई पक्राउ गरेको भन्दै नयाँ शक्ति नेपालका सचिवालय सदस्यहरु महेन्द्र पासवान र रामरिझन यादवले सोमबार विज्ञप्ती प्रकाशित गरी साहको गिरफ्तारीमा नेकपा माओवादी केन्द्रका नेता तथा गृहमन्त्री शक्ति बस्नेतको हात रहेको आशंका गरेको छ । जारी विज्ञप्तीमा मंगलबार राजविराजमा विरोध प्रदर्शन गर्ने जनाइएको छ ।
बाबुरामलाई झट्का, नयाँ शक्तिका जिल्ला संयोजक जेल चलान
Powered by Blogger.
0 comments
प्रतिक्रिया दिनुहोस्...