एकतर्फी नियन्त्रण रहेको खेलमा क्रोएसियाको शानदार जितका लागि मारियो मान्जुकी र निकोला कालिनिकले ह्याट्रिक गरे । घरेलु मैदानमा भएको खेलमा क्रोएसियालाई जिताउन मान्जुकीले २३, ३६ र ३८ तथा कालिनिकले ५९, ७३ र ८४ मिनेटमा गरी ह्याट्रिक पूरा गरेका हुन् ।

 यस्तै इभान रेकिटिक, इभान पेरिसिक, डारिजो सर्ना र मार्को पजाकाले एक एक गोल गरे । अन्तर्राष्ट्रिय फुटबलमा क्रोएसियाले कुनै पनि टिमलाई फराकिलो अन्तरले हराएको यो पहिलो पटक हो । 

यसअघि क्रोएसियाले सन् १९९८ अस्ट्रेलिया तथा सन् २००६ मा एन्डोरालाई ७–० ले हराएको थियो । शनिबार रातिको खेलमा सुरुको २० मिनेटसम्म गोल नभएपनि पहिलो हाफमा क्रोएसियाले ६–० को अग्रता लियो । समूह डीमा रहेको क्रोएसियाले जेठ ३० गते पेरिसमा टर्कीसँग खेल्दै युरोकपको सुरुवात गर्ने छ ।